Header Ads

මවකට අවමන් කල පොලිසියට අගවිනිසුරුගෙන් දඬුවම්


වරදක්‌ කළැයි කියන තරුණයකු පොලිසියට බාර වෙන තෙක්‌ 28 හැවිරිදි එක්‌ දරු මවක වන ඔහුගේ සොහොයුරිය පැය දෙකක්‌ අත්අඩංගුවේ රඳවා ගැනීමෙන් ඇයට සිදුකළ අනිසි හිරිහැරයට සහ අවමානයට
වන්දියක්‌ වශයෙන් ඇයට රුපියල් ලක්‍ෂ 1 1/2 බැගින් ලක්‍ෂ තුනක වන්දියක්‌ ගෙවන ලෙස කොට්‌ටාව පොලිසියේ වැඩ බලන ස්‌ථානාධිපති සහ එම පොලිසියේම තවත් නිලධාරියකුට ශ්‍රේෂ්ඨාධිකරණය ඊයේ නියෝග කළේය.

එම නිලධාරීන් දෙදෙනාගේ වැඩ වහාම තහනම් කර ඔවුන් කළ වැරදි ක්‍රියාව ගැන විනය පරීක්‍ෂණයක්‌ පැවැත්වීමට ඉක්‌මනින් පියවර ගන්නා ලෙසද පොලිස්‌පතිටද නියෝගයක්‌ නිකුත් කෙරිණි.


රටේ ජනතාවට අනවශ්‍ය හිරිහැර තාඩන පීඩන වලට භාජන නොවී පාඩුවේ ජීවත් වීමට ඉඩ තිබිය යුතු බවත් මෙම දඬුවම නියම කරන්නේ ඒ පොලිස්‌ නිලධාරීන් දෙදෙනාට පමණක්‌ නොව නීතිය අතට ගෙන අහිංසක මිනිසුන්ට හිරිහැර කරනු ලබන අනිත් පොලිස්‌ නිලධාරීන්ටද පාඩමක්‌ ඉගෙන ගැනීමට බවත් ඊයේ ශ්‍රේෂ්ඨාධිකරණය හමුවේ විභාග වූ මූලික අයිතිවාසිකම් නඩුවක තීන්දුව ප්‍රකාශයට පත්කරමින් අගවිනිසුරු මොහාන් පීරිස්‌ මහතා සඳහන් කළේය.

කොට්‌ටාව පොලිස්‌ ඒකකයේ වැඩබලන ස්‌ථානාධිපති උපුල් සහ එම පොලිසියේම සංවර්ධන සහකාර නිලධාරියෙක්‌ වශයෙන් සේවයේ අනුයුක්‌තව සිටින මාලඹේ පාර කොට්‌ටාව පන්නිපිටිය පදිංචි කොලොන් මුහන්දිරන් ගේ සිසිර මෙසේ වන්දි ගෙවීමට නියම වූ නිලධාරීන් දෙදෙනා වෙති.

කොස්‌වත්ත ගලපොත පාර පදිංචි ලක්‍ෂිකා දිලානි කුලතුංග මහත්මිය මෙහි පැමිණිලිකාරියයි.

මෙම නඩුවේ දෙවැනි විත්තිකරු වන උපපොලිස්‌ පරීක්‍ෂක උපුල් සහ 01 වෙනි විත්තිකරු සංවර්ධන නිලධාරී සිසිර ඊයේ උසාවියට පැමිණ සිටි අතර අගවිනිසුරුවරයා ඉහත කී වන්දිය නියම කළේ ඒ දෙදෙනාම ඉදිරියට කැඳවා සිදුකර තිබූ වරදේ බරපතළකම වටහා දීමෙන් අනතුරුවයි.

එම සිද්ධිය මෙසේය.

මෙම පෙත්සම්කාරියගේ සොහොයුරෙක්‌ එක්‌තරා තරුණියකට අනවශ්‍ය දුරකථන ඇමතුම් දෙන බවට පොලිසියට පැමිණිල්ලක්‌ ලැබී ඇත. ඔහුට පොලිසියේ පෙනී සිටින ලෙස දන්වා ඇතත් ඔහු පොලිසියට පැමිණ නැත. ඉන් පසුව එම තරුණයාගේ සොහොයුරිය පොලිසියට කැඳවා සහෝදරයා ගැන කරුණු විමසමින් ඇයට සමච්චල් කර ඇත.

ඇයගේ සොහොයුරු ගැවසෙන ස්‌ථාන ගැන ඇගෙන් ප්‍රශ්න කර ඇත. පොලිස්‌ නිලධාරියෙකුට පැවරෙන කාර්ය භාරය සිදුකර ඇත්තේ මෙහි 01 වැනි විත්තිකරු වන සංවර්ධන සහකාර නිලධාරියායි. පොලිස්‌ ස්‌ථානාධිපති ලෙස ඔහු මෙහිදී රඟපෑමක යෙදී ඇත. පොලිසියේ රඳවාගෙන සිටි ඇය නිදහස්‌ කර ඇත්තේ මේ බව සැලවී පැය දෙකකට පමණ පසුව පොලිසියට පැමිණි නීතිඥවරයෙකි.

ඊයේ මෙම නඩුවේ තීන්දුව ප්‍රකාශයට පත්කරමින් අගවිනිසුරුවරයා වැඩිදුරටත් සඳහන් කළේ පොලිසිය වැඩ බැලූ උප පොලිස්‌ පරීක්‍ෂක උපුල්ගෙන් පැමිණිලිකාරියට කිසිදු හිරිහැරයක්‌ සිදුනොවුණත් පොලිසියේ රාජකාරින් සංවර්ධන සහකාර නිලධාරියාට පවරා ඔහු පසෙකට වී සිටීමෙන් සංවර්ධන නිලධාරියා කළ වරදට ඔහුත් ඒහා සමානව වගකිවයුතු බව සඳහන් කරමිනි.

අගවිනිසුරු මොහාන් පීරිස්‌, චන්ද්‍රා ඒකානායක, සිසිර ද ආබෲ යන ත්‍රි පුද්ගල විනිසුරු මඬුල්ල හමුවේ පෙත්සම් විභාගය පැවැත්විණි. අධිනීතිඥ උපුල් කුමාරප්පෙරුම මහත්මිය, කෞෂල්‍යා පෙරේරා, උදුම්බර දිසානායක යන නීතිඥවරියන් සමඟ පෙත්සම්කාරිය වෙනුවෙන් පෙනී සිටියහ.

අධිනීතිඥ රුවන් කොඩිකාර 1 හා 2 වගඋත්තරකරුවන් වෙනුවෙන්ද ජ්‍යෙෂ්ඨ රජයේ අධිනීතිඥ ලක්‌මාලි කරුණානායක මහත්මිය නීතිපති වෙනුවෙන් පෙනී සිටියාය.


මිතුරන් දැනුවත් කරන්න SHARE කරන්න. උනුසුම් පුවත් ඔබේ Wall එකටම ගෙන්වා ගන්න Page එකට Like එකක් දාන්න.

No comments

මෙම පුවත පිලිබඳ ඔබේ අදහසත් ලියන්න.

Powered by Blogger.