Header Ads

රන්ජන්ට එරෙහි සටන දියවෙයි. පරිපාලන සේවා සංගමය සටන අතහරියි.


රංජන්ගේ ප්‍රකාශ රළු වුණාට ආයෙ වෘත්තීය ක්‍රියාමාර්ග ගන්නේ නෑ 

නියෝජ්‍ය අමාත්‍ය රංජන් රාමනායක මහතාගේ ක්‍රියා කලාපයට එරෙහිව යළි වෘත්තීය ක්‍රියාමාර්ග නොගන්නා බව ශ්‍රී ලංකා පරිපාලන සේවා සංගමය පවසයි.

එම සංගමයේ සභාපති රංජිත් ආරියරත්න මහතා අද (05) කොළඹ පැවති මාධ්‍ය හමුවකදී කියා සිටියේ තමන් එරෙහි වූයේ දිවුලපිටිය ප්‍රාදේශීය ලේකම්වරියට ප්‍රසිද්ධියේ ‘සොරෙක්‘යයි අපහාස කිරීම නිසා බවයි.

ඇයට එරෙහිව චෝදනා පැවතීම හෝ අල්ලස් හෝ දූෂණ චෝදනා විමර්ශන කොමිෂන් සභාවෙන් පරීක්ෂණ පැවැත්වීම ගැන තමන්ගේ කිසිදු විරෝධයක් නැති බවත්, වරදක් කර ඇත්නම් නිසි විමර්ශනයකින් අනතුරුව නීතිමය ක්‍රියාමාර්ග ගත යුතු බවත් ඔහු සඳහන් කළේය.

අදාළ ප්‍රාදේශීය ලේකම්වරිය පවා තමාට එරෙහිව නඟා ඇති චෝදනා සම්බන්ධයෙන් කඩිනම් පරීක්ෂණයක් සිදුකරන ලෙස ඉල්ලා ඇති බවත්, එය එසේම විය යුතු බවත් ආරියරත්න මහතා කියා සිටියේය.

නියෝජ්‍ය අමාත්‍ය රංජන් රාමනායක මහතාගේ ප්‍රකාශ රළු හෝ දැඩි වුවද, මින් පසු තමන් ඊට ප්‍රතිචාර නොදක්වන බවත්, මහජනතාව අපහසුතාවට පත්වන බැවින් යළි වෘත්තීය ක්‍රියාමාර්ග කරා යාමට කිසිදු බලාපොරොත්තුවක් නැති බවත් ඔහු වැඩිදුරටත් කියා සිටියේය.

ගම්පහ දිස්ත්‍රික් ලේකම් අසාර්ථක රාජ්‍ය සේවකයෙක්-අගමැති කාර්යාලය

මහත් ආන්දෝලනයකට පත්ව තිබෙන දිවුලපිටිය ප්‍රාදේශීය ලේකම්වරියට නියෝජ්‍ය අමාත්‍ය රන්ජන් රාමනායක මහතා තර්ජනය කළ බව කියන සිද්ධිය සම්බන්ධයෙන් ගම්පහ දිස්ත්‍රික් ලේකම්වරයා රජය අපහසුතාවට පත්කරමින්, වෘත්තීය සමිති නායකයකු ලෙස කටයුතු කරන බවට අග්‍රාමාත්‍ය කාර්යාලය චෝදනා කරයි.

ගම්පහ දිස්ත්‍රික් ලේකම් සුනිල් ජයලත් මහතා අදාළ සිද්ධිය සම්බන්ධයෙන් කඩිනම් පියවර ගන්නා ලෙස ජනාධිපති ලේකම්වරයා වෙත ලිපියක් යොමු කරමින් ඉල්ලා ඇති ලිපියේ පිටපතක් අග්‍රාමාත්‍ය කාර්යාලයට ලැබී ඇති අතර ඊට ප්‍රතිචාර දක්වමින් අග්‍රාමාත්‍ය ලේකම් ඊ.එම්.එස්.බී. ඒකනායක මහතා ස්වදේශ කටයුතු අමාත්‍යාංශයට යොමුකර ඇති ලිපියක මේ බව සඳහන් වෙයි.

දිස්ත්‍රික් ලේකම්වරයා සෘජුවම සිද්ධිය පිළිබඳ ස්වදේශ කටයුතු අමාත්‍යාංශයට දැනුම්දිය යුතුව තිබියදී අදාළ ලිපිය ජනාධිපති ලේකම් කාර්යාලයට යොමු කළේ ඇයිද යන්න පැහැදිලි නොවන බවද අග්‍රාමාත්‍ය කාර්යාලය ප්‍රශ්න කර සිටී.

ගම්පහ දිස්ත්‍රික් ලේකම්වරයා දෙපාර්තමේන්තු ප්‍රධාන නිලධාරියකු ලෙස තමන් යටතේ සිටින නිලධාරීන් හසුරුවා ගැනීමට හැකියාවක් තිබිය යුතු බවත්, මේ සිද්ධියේදී දිස්ත්‍රික් ලේකම්වරයා ජ්‍යෙෂ්ඨ රාජ්‍ය නිලධාරියකු වශයෙන් සම්පූර්ණයෙන්ම අසාර්ථක වී ඇති බවත් අග්‍රාමාත්‍ය කාර්යාලය පෙන්වා දෙයි.

අග්‍රාමාත්‍ය ලේකම්වරයාගේ අස්සනින් යුතුව ස්වදේශ කටයුතු අමාත්‍යාංශ ලේකම්වරයා වෙත යොමුකළ එම ලිපියේ තවදුරටත් දැක්වෙන්නේ අමාත්‍යාංශයේ සුදුසු කටයුතු සඳහා එය යොමුකර ඇති බවයි.

No comments

මෙම පුවත පිලිබඳ ඔබේ අදහසත් ලියන්න.

Powered by Blogger.