Header Ads

ලසන්ත ඝාතන සිද්ධියේ සාක්කි වසන් කළ පොලිස් ලොක්කෝ යළි රිමාන්ඩ්

ලසන්ත වික්‍රමතුංග මහතා ඝාතනය කිරීමේ සිද්ධියේ සාක්කි වසන් කළැයි සැකපිට අත්අඩංගුවට ගෙන සිටින හිටපු ජ්‍යෙෂ්ඨ නියෝජ්‍ය පොලිස්පති ප්‍රසන්න නානායක්කාර සහ උප පොලිස් පරීක්ෂක තිස්සසිරි සුගතපාල ලබන 15 වැනිදා තෙක් යළි රිමාන්ඩ් කරන ලෙස ගල්කිස්ස මහේස්ත්‍රාත් අධිකරණය අද (02) නියෝග කරන ලදි.

ජ්‍යෙෂ්ඨ නියෝජ්‍ය පොලිස්පතිවරයා අධික රෝගී තත්ත්වයෙන් පසුවන බව කියමින් ඔවුන් වෙනුවෙන් පෙනී සිටි නීතිඥවරු ඉල්ලා සිටියේ සැකකරුවන් ඇප මත මුදා හරින ලෙසයි.

අපරාධ පරීක්ෂණ දෙපාර්තමේන්තුව වෙනුවෙන් කරුණු දැක්වූ සහකාර පොලිස් අධිකාරී බී එස් තිසේරා සහ පොලිස් පරීක්ෂක නිශාන්ත සිල්වා මහත්වරුන් කරුණු දක්වමින් කියා සිටියේ සැකකරු එතරම් අසාධ්‍ය රෝගී තත්ත්වයකින් පෙළෙන්නේයැයි සනාථ නොවන බවයි. 

විමර්ශන තවමත් අවසන් නැති බැවින් සැකකරුවන්ට ඇප ලබා දෙනවාට විරුද්ධ බව රහස් පොලිසිය දැනුම් දුන් අතර ඉදිරිපත් වූ කරුණු සලකා බැලූ අධිකරණය සැකකරුවන්ගේ ඇප ඉල්ලීම ප්‍රතික්ෂේපකරන ලදි.

2009 ජනවාරි අට වැනි දා ලසන්ත වික්‍රමතුංග මහතා ඝාතනය කෙරුණු අතර ගල්කිස්ස පොලිසියේ අපරාධ විමර්ශන අංශය මුලින්ම විමර්ශන සිදු කළහ.

එලෙස විමර්ශන සිදු කරද්දී පොලිස් බල අපරාධ තොරතුරු පොතේ පිටු සහ ලසන්ත වික්‍රමතුංග මහතාගේ සටහන් පොත උපපොලිස් පරීක්ෂක සුගතපාල මහතා ජ්‍යෙෂ්ඨ නියෝජ්‍ය පොලිස්පති ප්‍රසන්න නානායක්කාර මහතාට ලබා දී ඇතැයි රහස් පොලිසිය මීට පෙර අධිකරණයට දැනුම් දී තිබේ.

උපපොලිස් පරීක්ෂකගෙන් එම සටහන් ජ්‍යෙෂ්ඨ නියෝජ්‍ය පොලිස්පති ලබා ගනිද්දී ජ්‍යෙෂ්ඨ පොලිස් අධිකාරී හේමන්ත අධිකාරී මහතා එය දැක ඇතැයි ද රහස් පොලිසිය පවසයි.

මෙම විමර්ශනය අතරමඟ නැවතුණු අතර ඉන් පසු 2009 වසර අගදී විමර්ශන රහස් පොලිසියට පැවරිණි. 

යළි 2010 ජනවාරි මාසයේ දී විමර්ශන ත්‍රස්ත විමර්ශන ඒකකයට පැවරුණු අතර එම අංශය මගින් ට්‍රිපෝලි යුද හමුදා කඳවුරේ බුද්ධි අංශ සාමාජිකයෙක් අත්අඩංගුවට ගනු ලැබීය. 

කොහුවල යුද හමුදා කඳවුරේ 17 දෙනකුද අත්අඩංගුවට ගෙන දින කිහිපයක් රඳවා තබාගෙන පොලිස් ඇප මත මුදා හැර තිබිණි.

යළිත් මෙම විමර්ශන රහස් පොලිසියට පැවරුණේ 2015 වසරේදීය.

උපුටා ගැනීම -  lankadeepa.lk
තරිඳු ජයවර්ධන

No comments

මෙම පුවත පිලිබඳ ඔබේ අදහසත් ලියන්න.

Powered by Blogger.